یہ بات اچھی طرح ذہن نشین کرلینی چاہیے کہ حضور نبی اکرم ﷺ کا ہر حکم شریعت اور آپ ﷺ کا ہر قول و عمل اِسلام ہے اور اس کی مخالفت کفر ہے۔ اسی لیے قرآنِ مجید میں آپ ﷺ کی نسبت یہ حکم وارد ہوا ہے: ’’اور جو کچھ رسول ( ﷺ ) تمہیں عطا فرمائیں اُسے لے لیا کرو اور جس سے تمہیں منع فرمائیں (اُس سے) رُک جایا کرو۔‘‘ (الحشر، 59 : 7)

قرآنِ حکیم کے بعد ہمارے لیے ہدایت و رہنمائی کا سرچشمہ سرورِ کائنات ﷺ کی احادیث مقدسہ ہیں جس کے مبلغ کے لیے رحمتِ عالم ﷺ نے خصوصی دعا فرمائی ہے: ’’اللہ تعالیٰ اُس مردِ مومن کو رونق و تازگی بخشے جس نے میری حدیث سنی، پھر اسے یاد رکھا اور بعینہ اُسے آگے پہنچایا۔‘‘ (جامع ترمذی)

چنانچہ حضور نبی اکرم ﷺ کی اِس مبارک دعا کا مصداق بننے اوردنیوی و اُخروی برکات سمیٹنے کے لیے ہر دور میں اَئمہ کرام نے اپنے اپنے ذوقِ علمی اور اس دور کی ضرورت کے مطابق مختلف موضوعات پر چالیس احادیث کے مجموعے مرتب کیے ہیں۔

شیخ الاسلام ڈاکٹر محمد طاہرالقادری مدظلہ العالی دور حاضر کے عظیم محدث، مجدد اورسچے عاشقِ رسول ﷺ ہیں۔ آپ پوری اُمتِ مسلمہ کو حضور نبی اکرم ﷺ سے محبت جیسی سعادت و نعمت سے آشنا کروانا وقت کی اہم ایمانی ضرورت سمجھتے ہیں۔ آپ شب و روز اسی فکر میں لگے رہتے ہیںکہ امت کا ہر فرد حضور نبی اکرم ﷺ کے کمالاتِ معنوی اور جمالِ ظاہری سے ذہناً اور قلباً وابستہ ہو جائے۔ علاوہ ازیں اللہ تعالیٰ نے آپ کو یہ امتیاز عطا فرمایا ہے کہ آپ نے اُمت کے ہر مرض کے اَسباب کی نہ صرف درست تشخیص کی بلکہ اس کا مناسب علاج بھی تجویز فرمایا۔ آپ نے دورِ جدید کے تقاضوں کو مد نظر رکھتے ہوئے عوام و خواص دونوں کی علمی و فکری رہنمائی اور عقیدہ و عمل کی پختگی کے لیے احادیث مبارکہ سے خوب استفادہ کیا اور 100 کے قریب چھوٹے بڑے مجموعہ ہائے احادیث مرتب کیے۔ زیرِ نظر اربعین: ’اسماء و صفات الٰہیہ‘ ہے، اس میں اللہ تعالیٰ کے اسماء و صفات سے متعلق 41 احادیثِ مبارکہ جمع کی گئی ہیں۔ 

فہرست

🔹 اللہ تعالیٰ کے اسماء حسنی کو یاد کرنے کی فضلیت

🔹 اسمائے الہیہ کے وسیلے سے دعا کرنا اور پناہ مانگنا

🔹 اللہ تعالیٰ کی صفات جلیلہ

🔹 اللہ تعالیٰ کا ہمیشہ زندہ ہونا اور اسے کبھی موت اور نیند نہ آنا

🔹 اللہ تعالیٰ کی شان قدرت

🔹 اللہ تعالیٰ کی شان تخلیق

🔹 اللہ تعالی کا امر اور ارادہ

🔹 اللہ تعالیٰ ہی عرش عظیم کا رب ہے

🔹 اللہ تعالیٰ بڑا بشخنے والا نہایت مہربان ہے

🔹 اللہ تعالیٰ تمام جہانوں کا مالک ہے

🔹 اللہ تعالیٰ عالم الغیب والشہادۃ ہے

🔹 اللہ تعالیٰ سمیع ہے

🔹 اللہ تعالیٰ بصیر ہے

🔹 بڑائی اللہ تعالیٰ کا اوڑھنا اور عظمت اس کی چادر ہے

🔹 حضور ﷺ کا ارشاد گرامی ہے: کوئی شخص اللہ سے زیادہ غیرت مند نہیں