یہ بات اچھی طرح ذہن نشین کرلینی چاہیے کہ حضور نبی اکرم ﷺ کا ہر حکم شریعت اور آپ ﷺ کا ہر قول و عمل اِسلام ہے اور اس کی مخالفت کفر ہے۔ اسی لیے قرآنِ مجید میں آپ ﷺ کی نسبت یہ حکم وارد ہوا ہے: ’’اور جو کچھ رسول ( ﷺ ) تمہیں عطا فرمائیں اُسے لے لیا کرو اور جس سے تمہیں منع فرمائیں (اُس سے) رُک جایا کرو۔‘‘ (الحشر، 59 : 7)

قرآنِ حکیم کے بعد ہمارے لیے ہدایت و رہنمائی کا سرچشمہ سرورِ کائنات ﷺ کی احادیث مقدسہ ہیں جس کے مبلغ کے لیے رحمتِ عالم ﷺ نے خصوصی دعا فرمائی ہے: ’’اللہ تعالیٰ اُس مردِ مومن کو رونق و تازگی بخشے جس نے میری حدیث سنی، پھر اسے یاد رکھا اور بعینہ اُسے آگے پہنچایا۔‘‘ (جامع ترمذی)

چنانچہ حضور نبی اکرم ﷺ کی اِس مبارک دعا کا مصداق بننے اوردنیوی و اُخروی برکات سمیٹنے کے لیے ہر دور میں اَئمہ کرام نے اپنے اپنے ذوقِ علمی اور اس دور کی ضرورت کے مطابق مختلف موضوعات پر چالیس احادیث کے مجموعے مرتب کیے ہیں۔

شیخ الاسلام ڈاکٹر محمد طاہرالقادری مدظلہ العالی دور حاضر کے عظیم محدث، مجدد اورسچے عاشقِ رسول ﷺ ہیں۔ آپ پوری اُمتِ مسلمہ کو حضور نبی اکرم ﷺ سے محبت جیسی سعادت و نعمت سے آشنا کروانا وقت کی اہم ایمانی ضرورت سمجھتے ہیں۔ آپ شب و روز اسی فکر میں لگے رہتے ہیںکہ امت کا ہر فرد حضور نبی اکرم ﷺ کے کمالاتِ معنوی اور جمالِ ظاہری سے ذہناً اور قلباً وابستہ ہو جائے۔ علاوہ ازیں اللہ تعالیٰ نے آپ کو یہ امتیاز عطا فرمایا ہے کہ آپ نے اُمت کے ہر مرض کے اَسباب کی نہ صرف درست تشخیص کی بلکہ اس کا مناسب علاج بھی تجویز فرمایا۔ آپ نے دورِ جدید کے تقاضوں کو مد نظر رکھتے ہوئے عوام و خواص دونوں کی علمی و فکری رہنمائی اور عقیدہ و عمل کی پختگی کے لیے احادیث مبارکہ سے خوب استفادہ کیا اور 100 کے قریب چھوٹے بڑے مجموعہ ہائے احادیث مرتب کیے۔ زیرِ نظر اربعین: ’تعلیم اور تعلم کی فضیلت و تکریم‘ ہے، اس میں علم اور علماء کی فضیلت، علم حاصل کرنے کی فضیلت، علم سیکھنے اور سکھانے کی فضیلت اور علم کیلئے سفر کرنے کی فضیلت سے متعلق 41 احادیثِ مبارکہ مع اُردو ترجمہ و کامل تحقیق و تخریج اور ضروری شرح جمع کی گئی ہیں۔

فہرست

🔹 علم اور علماء کی فضیلت

🔹 اللہ جس کے ساتھ بھلائی کا ارادہ فرماتا ہے اسے دین کی گہری سمجھ عطا کر دیتا ہے

🔹 ایک فقیہ، شیطان پر ہزار عابدوں سے زیادہ بھاری ہے

🔹 علم حاصل کرنا نفل نماز سے بہتر ہے

🔹 کسی شخص کا علم سیکھنا اور سکھانا بہترین صدقہ ہے

🔹 علم سیکھنے اور سکھانے کا درجہ اور ان کا اجر

🔹 علم و حکمت میں رشک کرنا

🔹 مذاکرہ حدیث کی فضیلت اور اس کے آداب

🔹 احادیث رسول ﷺ اور علم کے لیے سفر اختیار کرنا

🔹 علماء انبیاء کرام کے وارث ہیں

🔹 علماء کرام سے سیکھنے کی فضیلت

🔹 علم پھیلانے کی ترغیب اور حصول علم کے دوران موت کی فضیلت

🔹 اللہ تعالیٰ روز قیامت علماء کی بخشش فرمائے گا

🔹 روز قیامت علماء شفاعت کریں گے

🔹 آخری زمانہ میں علم کے اٹھائے جانے کا بیان

🔹 علم رکھتے ہوئے اپنے کہنے پر عمل نہ کرنے پر تنبیہ

🔹 رضاء الہی کے علاوہ کسی اور نیت سے علم سیکھنے کا وبال